دماو چن ساڵا هەوڵ و مانیایی پەی پەرەدای سیستموو ئەوەئەژناسای دەنگی (تایپیی ئۆتۆماتیک) پەی زوانی کوردی و ئەرەمەرزنای ئا تێکنۆلۆژیه پەی دوێ زاراوێ زوانی کوردی یانی کوردیی دلێڕاسین و کوردیی سەرین، یاوگەما ئانەنه که ئیسه ئی تێکنۆلۆژییه، پەی هەورامیچ پەره دەیمێ.
پەی پەرەپنەدای ئی سیستمیه، ئەوەجەما به هامکاری شمەی هاموەڵاتی هەن تاکەتی جه ئامادەکەردٚەی و کۆوەکەردٚەی داتاکانه یارمەتیما دەیدێ. پەی ئی هەرمانێ، ئێمه ئامرازێوما وەش کەردٚەن که ڕەستەتا پنه پێشنیار کەرۆنه و شمەیچ ڕەستەکەی تۆمار کەردێ. ئێمه کۆتایەنه ئی دەنگا، پەی درۆس کەردٚەی سیستمێوی ئەوەئەژناسای دەنگی پەی هەورامی، بە کار مارمێ. بێبەشداری چالاکانەو شمەی وەشەسیای، پەرەدای ئی سیستمیه مومکێن نیا، پی بۆنەوه هامکاری شمه بۆ به بەشێوی گرینگ چی هەوڵه نیشتمانییەنه. بنەڕاوه دەسوەشیتا چنه کەرمێ و سپاستا کەرمێ که چی ڕانه و وەڵوستەی زوانەکەیمانه پەی ژیریی دەسکردی، یاریدەرێما بیدێ.
ڕانموونی تۆمار کەردٚەی دەنگی؛
- ڕەستەکا دلێو یاگێوێ بێدەنگێنه تۆمار کەردێ.
- دەنگەکا به یەکجاری تۆمار نمەکەردێ. دماو نیم سەعات یام ئەوپەڕش یەک سەعاتی، ئیسراحەتێو کەردێ.
- ڕەستەکا ڕێک پێسەو ئانەیه نویسیەینه، تۆمار کەردێ. هیچش نمەوزدێ سەر و هیچش چنه نەقرتندێ، ڕێک پێسەو وێش.
- ڕەستەکا ڕێک پێسەو ئانەی نویسیان بواندێوه، نەک به زاراوه/ لەهجەو وێتا. مەسەڵەن ئەگەر نویسیان «ملوو»، به «نمەلوو»، «نملوو»، «مەلوو» یام «ملو» نەواندێوه.
- وەڵێو تۆمار کەردەی ڕەستەکەینه، جارێو لاو وێتاوه و به دەنگی بەرز بواندێشەوه تا دڵنیای بیدێ که ئامادێندێ پەی درۆس ئەوەوانایش.
- وەڵێو ئانەینه تۆمار کەردٚەی دەیدێ ونه، دەس نەکەردێ به ئەوەوانای، با واژه سەرەتایەکێ نەقرتیا.
- دماو ئانەیه ڕەستەکا تەمامیا، یەک چرکەنه مایکەکەی بیندێ، تا جه کۆتایی فایلەکەینه، بێدەنگی فره نەبۆ. هەرپاسه وەڵێو تەمام بیەی ئەوەواناکەی، مدرنای نەدٚەیدێ ونه، تا واژه ئاخرینەکێ نەقرتیا.
- وەڵێو ئانەینه دەنگەکەی کیاندێ، وێتا جارێو گۆشش داردێنه تا دڵنیای بیدێ که کێشێو نیا فایلەکەنه و ڕێک پێسەو نویسیاکەی تۆمار کریان و دەنگەکه عال دیارا. ئەگەر دەنگەکه ڕێک دیار نەبی، کرچەکرچش بی، واژێوتا پڕنا بۆ، قۆزەتا بیەن یام هەر کێشێوتەر چی بابەتیه، جارێوتەر تۆمارش کەردێوه، ئیجا کیاندێش.
- با وەختێو دەنگ تۆمار کەردێ، مایکەکه فره جه دەمیتا دوور نەبۆ.
- وەختوو تۆمار کەردٚەینه، مایکەکەی فره نمەژڵێوندێوه (جووڵەجووڵش پنه نمەکەردێ).
- به لەپتاب و مۆبایلیچ متاودێ دەنگ تۆمار کەردێ، بەڵام به مۆبایل خاستەرا.
- یاگێوەنه دەنگ تۆمار نەکەردێ که دەوروبەرتانه قسێ کەرا.
- ڕەستەکا نه فره شێنەی بواندێوه و نه فره کرژ. ڕێک سەروو وێ.